Viaduct iti Brgy. Pancian iti ili ti Pagudpud, manamnama a mairugi a maipasdek iti sumaruno a bulan

LAOAG CITY – Manamnama ti pannakairugin ti pannakaipasdek ti viaduct iti Brgy. Pancian iti ili ti Pagudpud iti sumarsaruno a bulan.

Daytoy ti inpakaammo ni Ilocos Norte 1^st District Representative Sandro Marcos.

Segun kenkuana, maibasar iti naawatna nga impormasion manipod iti Department of Public Works and Highways ket posible a marugianen ti pannakaipasdek ti viaduct iti kabiitan a panawen ngem saanna daytoy a dagdagen tapno napinpintas ken nasaysayaat met laeng ti pannakaaramid daytoy.

Inbatadna a mangnamnama met daytoy a malpas ti pannakaipasdek ti viaduct sakbay nga agngudo ti umuna a terminona.

Inlawlawagna a babaen iti daytoy ket maalay-ayan ti rikna dagiti kakailian nangnangruna ket saan a maliklikan ti panagreggaay ti daga iti tunggal agtudo iti nasao a lugar.

Maipalagip a napundoan iti nasao a proyekto ti 300 a milyon a pisos.