LAOAG CITY – Kalikagom ni Vice Gov. Matthew Marcos Manotoc a mabayadan amin ti utang dagiti mannalon ken mapatibker dagiti kooperatiba tapno ad-adda pay nga agbalinda a responsable.
Segun kenni Manotoc, daytoy ti rason no apay nga an-anusan dagiti mannalon nga ilako dagiti irik da kadagiti traders gapo ta adda dagiti umut-utang kadagitoy.
Inbatadna a dagiti traders ken dagiti agpapautang iti 5-6 ti us-usto a kalaban.
Malaksid iti daytoy, kunana uray dagiti mannalon iti bawang ket basssit ti mapastrek da ngem saan met a mabalin a saan da nga agmula gapo ta Garlic Capital ti probinsya.
Mainaig iti daytoy, inlawlawag ti bise gobernador a nakisarita pay iti Landbank of the Philippines ken Development Bank of the Philippines tapno masolbar ti problema dagiti mannalon.
Kunana pay a ti maysa a solusyon ket ti pannakikoordinar da kadagiti dadakkel a kompanya nga isu ti pagilakoan kadagiti irik.
Kabayatanna, inbatad ti bise gobernador nga iti unos ti innem a tawen a panangsolbar na iti problema dagiti mannalon ket nakitana a saan a mairekomendar ti panagmula ti pagay gapo ta awan ti mapastrek dagiti mannalon.
Dinakamat na a napinpintas pay no dadduma ti mais ken maymayat daigi bamboo, cacao, ken prutas.
Innayon na a nasayaat a saan a makipagtrabaho ti probinsya iti National Food Authority gapo ta no dadduma ket alaen ti ahensya ti credit iti laksid a programa ti gobierno probinsyal ti buy back.
