LAOAG CITY – Kinataripnong ni Vice Gov. Matthew Marcos Manotoc dagiti Mayor ken dagiti Municipal/City Resiliency Officers iti nagdumaduma a Local Government Units wenno LGU’s ditoy probinsia.
Segun ken ni Engr. Randy Nicolas, Local Disaster Risk Reduction and Management Officer 3 ti Provincial Resiliency Office, napagsasaritaanda ti maipanggep dagiti programa ken proyekto a mabalin a maipatungpal bayat a saan pay a nadanon ti panawen ti panagtutudo.
Inlawlawagna a babaen iti daytoy ket maalay-ayan no saan man a malapdan a maminpinsan ti kas kadagiti napasamak a panaglayus ditoy probinsia kadagiti kallabes a tawen.
Kunana a kangrunaan ditoy ti pannakadalus dagiti pagayusan ti danum kas iti kanal.
Inlawlawagna nga indiaya ti bise gobernador dagiti “heavy equipment” ti probinsia a mabalin a buluden dagiti maseknan.
Inpettengna nga inpakaammona pay a mabalin pay dagiti Local Government Unit ti agkiddaw ti “fuel subsidy” para iti pannakakutkut wenno pannakadalus dagiti kanal, waig wenno karayan.
Innayon ni Nicolas a mabalin dagitoy nga isubmitir dagiti kiddawda iti opisinada tapno mai-schedule dagiti “heavy equipment” ti probinsia.
