LAOAG CITY – Manamnama a maaprubaran iti maikatlo ken maudi a pannakaibasa na ti narevised nga Annual Investment Plan iti ili ti Vintar intono Biyernes bayat ti regular session.
Daytoy ti inpakammo ni Vice Mayor Maribel Albano iti ili ti Vintar.
Segun kenni Albano, iyalisto da met ti pannakatratar ti annual budget para iti ili da ita a tawen tapno maaprubarenen daytoy.
Inlawlawag ni Albano a ti rason ti saan nga alisto a pannakaaprubar ti budget da ket narebisar a nalaing ken saan a pudno ti rumrumuar a daytoy ket gapo ta saan nga inaprubaran ti Mayor ti staffing pattern.
Kunana a saan pay a pudno a ti rason ti saan pay a pannakaaprubaran ti budget ket gapo iti pulitika no sadinno ket saan nga agkadua ti Executive ken Legislative.
Inpetteng na a nailawlawag da metten iti Dept. of Interior and Local Government babaen iti taripnong no anya ti napasamak no apay a saan pay a naaprubaran ti pondo.
Karaman ditoy kadagiti kurang a dokumento wenno attachement a masapol da met para iti panangadal da iti pondo.
Patien na a saan a nagkurang ti legislative branch a nangadal iti budget.
Kabayatanna, inpasigurado ni Albano a maaprubaran ti budget ti 2023 iti ili ti Vintar agingga iti deadline a Marso 30.
