LAOAG CITY – Indasar ni Vice Mayor Rey Carlos Fariñas ditoy ciudad ti Laoag ti maysa nga ordinansa a makatulong tapno maprebentaran ti pannakalmes dagiti agturong kadagiti resort ken recreational places ditoy ciudad.
Ti ordinansa ket napaulwan iti Integrated Water Safety wenno IWAS Ordinance.
Nakailanad iti nasao nga ordinansa a kasapulan a tunggal resort, beaches ken waterparks ditoy ciudad ket addaan ti Certified Lifeguards, safety signages, rescue equipments kas iti AEDs ken public education kadagiti amin a water recreational facilities.
Segun iti bise mayor, daytoy ket kalpasan ti pannakaisayangkat ti NMYL Regional Assembly idiay San Juan, La Union no sadinno inpkakammo ni DILG Regional Director Jonathan Paul Leusen Jr. nga ado a lokal a gobierno iti rehiyon ti awanan ti water safety ordinance.
Inlawlawag na a daytoy ti nangiduron kenkuana tapno aramiden ti ordinansa nangruna ket patien na a nakababain a mismo a lugar ti Presidente iti pagilian ket awanan ti kastoy a pagannurotan.
Inbatad na a napintas daytoy gapo ta ado dagiti maes-establisar a resort, beaches ken waterparks ditoy ciudad ken addadagiti nairekord a nalmes iti kallabes.
Mainaig iti daytoy, dagiti aglabsing iti pagannurutan ket mamulta iti 2,000 pesos iti first offense, 3,000 pesos ken pannakasuspenso iti operasyon ti swimming poll iti second offense ken 5,000 pesos ken mairekomendar ti pannakarikep ti negosyo iti maikatlo ken sumarsaruno pay a panaglabsing.
Mainaig iti daytoy, kunana nga adda ti naiyuswat a public hearing nga inatendaran dagiti agtagikua iti resorts ken immanamong da iti kalikagom ti bise mayor. Kabayatanna, naipasa ti nasao ordinansa iti maikadua a panakaibasa na iti 15th resular session konseho ditoy ciudad.
