LAOAG CITY – Kalikagum ni Vice Mayor Rey Carlos Fariñas ditoy ciudad ti Laoag a maadaptar ti Artificial Intelligence wenno AI iti Sangguniang Panlungsod, partikular iti Office of the Sanggunian Services wenno OSS.
Inwaragawag daytoy ti bise mayor kabayatan iti chairmans time-na iti maika-61 a regular session ti Sangguniang Panlungsod ditoy siudad.
Inbatad na a kalpasan ti pannakipasetna iti National Movement of Young Legislators idiay Singapore idi Biernes, Agosto 28, mainaig iti panagadal iti pannakausar ti Artificial Intelligence iti panagserbi iti gobierno.
Segun kenkuana, mabalin a mapagbalin kas personal assistant ti Artificial Intelligence iti Office of the Sanggunian Services tapno makatulong iti napartak a panagsukisok kadagiti ordinansa ken resolusyon, ken iti panangtingiting kadagiti possible a kurang dagitoy.
Kunana a mabalin pay a makatulong ti Artificial Intelligence iti panangipalagip kadagiti due date iti pannakaamendar dagiti ordinansa, aglalo ket adda ti mandato a pasingkedan dagitoy iti kada uppat a tawen.
Kabayatanna, inrekomendar ni Vice Mayor Fariñas a mairaman iti 2027 budget ti pannaka-adaptar ti Artificial Intelligence iti Office of the Sanggunian Services, ken sumaruno dagiti dadduma a departamento, tapno makatulong met iti panagmonitor kadagiti presyo, anomalya, ken dadduma a problema iti operasyon ti gobierno ditoy siudad ti Laoag.
