LAOAG CITY – Sinuratanen ti Laoag City Vice Mayor Rey Carlos Fariñas ti hepe ti Philippine National Police ditoy ciudad tapno ipakamo a saan nga umno ti ar-aramiden da a panangserra iti kalsada a sakupen ti Ablan Ave. wenno dalan nga agturong iti Centennial Arena.
Segun kenni Fariñas, saan pay a maipakammo ti kapulisan iti Mayor ken konseho ti ciudad ti aramiden da a nasken kuma nga isu ti proseso.
Kunana a nakailanad iti surat na ti local government code nga isu ti pagibasaran a saan a rumbeng ti inaramid ti Philippine National Police.
Inlawlawag ti bise mayor a gapo iti inaramid ti kapulisan ket mabalin da a sumango iti kaso administratibo.
Inbatad na a mismo a napasaran na ti nairot a trapiko kabayatan ti panangitulod na iti anak na iti pagadalan isut gapo na a napilitan a nagnagna dagiti estudyante tapno saan a maladaw iti klase.
Maipalagip a naserraan ti nasao a paset ti kalsada gapo iti naiyuswat a Teachers Day Celebration idi kalman no sadinno agarop innem a ribo ti nakipagpaset.
Maipalagip a kabayatan iti regular session ti konseho ken inbatad ti bise mayor nga awan ti ordinansa wenno executive order a mangipalubos ti pannakairikep ti kalsada iti lawlaw ti Centennial Arena.
Kabayatanna, inkarigatan ti Bombo Radyo a maalaan ti komento ti pulisya ngem saan pay a nangiparuk-at iti aniaman a palawag.
