LAOAG CITY – Nagpanawagan dagiti kameng ti Vice Mayor for Good Governance iti transparency ken accountability kadagiti flood control projects a naestablisar ditoy pagilian.
Daytoy ket kabayatan nga umad-ado dagiti madukduktalan ti gobierno a maanomalya a flood control projects gapu ta rumrumwar a substandard dagitoy ket saan nga usto ti pannakaibanag dagiti minilyon a pondo.
Ti nasao a grupo ket idadaulwan ni Laoag City Vice Mayor Rey Carlos Farinas; Alaminos City Vice Mayor Anton Perez; Bongabon Vice Mayor Christian Binuya; Magallanes Vice Mayor Aina Mari Sisante-Maligalig ken ni Lingayen Vice Mayor JM Crisostomo.
Gagem ti grupo a protektaran dagiti Pilipino manipod kadagiti saan a napintas nga aramid dagiti sumagmamano a pulitiko.
Nagpanawagan pay ti Vice Mayor for Good Governance iti panakaiparuk-at dagiti detalye ti proyekto, pannaka-assess manipod iti Commission on Audit ken pannakaipataw ti pannusa kadagiti adda iti likodan dagitoy a kunniber nga aramid.
Innayon ti grupo a kasapulan ti naan-anay a partisipasyon dagiti Local Government Units tapno masigurado a dagiti nasao a proyekto ket mangipaay ti solusyon kadagiti kasapulan ti komonidad.
Inrakurak ti grupo a ti flood control projects ket wagas tapno maprotehiran dagiti tattao manipod iti layos ken saan a rangtay ti nayon a pamastrekan.
