LAOAG CITY – Nangipaay ni Vice Mayor Denton Garvida iti ili ti Bangui ti Solar Power Water System iti Barangay Payac iti nasao nga ili.
Nammuan a daytoy ti umuna a barangay a maaddaan ti kastoy a ramit iti nasao nga ili.
Segun ken ni Garvida, napanunutanna daytoy sipod ta naobserbaranna a marigatan dagiti residente ti panagsakdo ti danum nangruna nu panawen ti tikag.
Kinunana nga adda met ti inpaay idi ti gobierno ngem dua laeng a bulan ket naperdi daytoyen.
Innayonna, a saanna nga inaramat ti lokal a gobierno tapnu mapatgan daytoy a kalikagom dagiti residente nu diketdi manipod mismo iti bulsana.
Kabayatanna, nagyaman ni Mr. Jimmy Agrade, presidente ti grupo a nakaipaayan ti water system kenni Vice Mayor Denton Garvida gapu ta saandan a maproblemaan pay nga agkurang ti usarenda a danom.
Segun kenkuana, 52 a pagtaengan ti mabenepisyaran iti daytoy, sabali pay dagiti agnanaed iti Sitio Alao-ao.
Inbatad met ti maysa kadagiti miembro ti asosasyon a dakkel a pakalag-anan da ti inpaay ni ti Bise Mayor.
