LAOAG CITY – Nangipila ni Vice Mayor Kitt Aguinaldo iti ili ti Pasuquin ti motion for reconsideration iti Commission on Elections.
Daytoy ket kalpasan a nakaawat ni Vice Mayor Aguinaldo ti surat manipud iti Commission on Elections nga inaprobaranna ti petision a makanselar ti kandidatura ti opisial iti panagpaidasigna iti kina-Bise Mayor gapu iti maipagarup a saan nga umiso nga impormasion dagiti nakailanad iti Certificate of Candidacy-na.
Segun ken ni Vice Mayor Aguinaldo, amin nga impormasion a naipalaon iti Certificate of Candidacy daytoy ket husto.
Nupay kasta, inadmitirna nga adda ti nagkamalianda a notarized date.
Inlawlawagna nga awan ti kinapudnona nga isuna ket United States citizen no diket maysa daytoy a Filipino citizen.
Kunana a naipasanan iti Commission on Elections ti palawagna maipanggep kadagiti alegasion pakairamanan dagiti dokumento a mangsuporta kadagitoy.
Innayonna nga iti agdama ket iyur-urayda laengen ti desision ti Commission on Elections maipapan iti daytoy a banag.
