LAOAG CITY – Naglikudan ni Vice Mayor Vicentito Lazo ditoy siudad ti Laoag a pamulpulitika ti araramiden da mainaig iti pannakaimbestigar ti proyekto iti Sitio 4, Brgy. Buttong ditoy siudad no sadino a napondoan babaen it siudad ken iti DPWH first engineering district.
Inlawlawag na a saan a ti proyekto iti Brgy. Buttong ti maim-imbestigar ngem ketdi adda pay dagiti proyekto iti sabali a barangay kas iti Brgy. Balatong ken iti Brgy. 7-A, 7-B ken iti Brgy. 8 ditoy siudad.
Nasdaaw ni Lazo no apay nga arig depdepensaan ni Barangay Chairman Jessie Bonoan ti proyekto iti barangay da idinto nga im-imbestigaren da mainaig iti maipagarup a substandard a kalidad ti proyekto.
Kabayatanna, inpetteng ni Lazo nga “in aid of legislation” ti ar-aramiden da a panagimbestigar gapu ta isu ti poder ti Sangguniang Panlungsod.
Daytoy ket gapu ta saan nga umanamong ni Lazo mainaig iti sarita ti kapitan a masapul ti COA report no agimbestigar da.
Kuna na nga adda pay ti resulosyon a maikidkiddaw iti district engineer iti umuna a distrito ken iti regional director ti DPWH a maamuan ti siudad ti Laoag dagiti maipatungpal, manarimaan a maipatpatungpal ken dagiti nalpasen a proyekto tapno saan a maulit dagitoy.
Mainaig iti daytoy, sinungbatan ni Lazo ti nagbalin pay a sarita ni Kapitan Bonoan a saan a Sitio 4 iti nakaipatungpalan ti proyekto ngem ketdi naipan iti Sitio 1.
Kuna na a ti maysa a saludsod iti kapitan no bilang adda ti karbengan na a mangipatungpal ti naiyalokar a pondo para iti Sitio 4 ngem naibubok iti Sitio 1.
Inbatad ni Lazo a mabalin a nakaaramid ti kapitan iti technical malversation.
Maipalagip a nakita ti Sangguniang Panlungsod iti maipagarup a nadoble a nabayadan ti proyekto iti Sitio 4 kas naibasar kadagiti iggem da a dukomento rason a naiyuswat ti inspeksiyon ken imbestigasyon.
Innayon ni Lazo a nakita nga adda ti sealant a nagmaris iti gray iti nasemento a kalsada kabayatan ti inspeksiyon idi ta inlawlawag dagiti inhinyero iti siudad a saan da nga agikabil iti sealant no mangipatungpal da ti proyekto.
Rason a possible a proyekto ti DPWH ti adda iti Sitio 4.
