LAOAG CITY – Kalikagum ni Vice mayor Rey Carlos Fariñas a mai-update ti nakaipalaon ti fare guide a maikabil kadagiti tricycle ditoy ciudad ti Laoag.
Daytoy ti nagbalin a rakurak na kalpasan nga inpakaammo ni Konsehal Jaybee Baquiran nga adda dagiti naipadanon a report kenkuana maipanggep iti sobra a panagsingir ti plete kas iti maysa a pasahero a naglugan manipod capitol agingga iti dakkel a mall ditoy ciudad ket nasingir da ti 60 a pisos.
Segun iti bise mayor, rumbeng a maikabil iti fare guide dagiti key areas wenno plete kadagiti partikular a lugar tapno saan a patpatangan dagiti tricycle drivers no mano ti singiren da a plete.
Innayon na a malaksid iti daytoy ket kasapulan a makita ti tricycle ti maysa nga agaplikar ti prangkisa no adda ti nakaikabil a fare guide wenno awan.
Inbatad na pay a kasapulan a maimprenta ti tarpaulin ken maikabil iti tunggal terminal ti tricycle dagiti pammalagip kas iti proseso iti panagreklamo, hotline wenno numero a mabalin a tawagan, ken multa a kaibatogan dagiti masalungasing dagiti trucycle drivers ditoy ciudad ti Laoag.
Segun iti bise mayor, babaen iti daytoy nga addang ket al-alisto a makita ken mapakaamwan dagiti residente ditoy ciudad ken maikkan ti pagbutngan dagiti tricycle drivers nga agbalin nga abusado aglalo iti panagsingir ti plete.
Maipalagip nga immunan nga inpakaammo ti bise mayor iti regular session nga adda ti 4 a tricycle drivers ditoy ciudad ti naipaayan ti citation ticket kalpasan a naduktalan a sobra ti panagsingir da ti plete kabayatan ti Palarong Pambansa 2025
