LAOAG CITY – Binallaagan ni Vice Mayor Rey Carlos Fariñas dagiti tricycle driver ditoy ciudad ti Laoag a nalabes unay ti panagsingir na ti plete.
Daytoy ket kalpasan a na-experience na a mismo daytoy a banag gapu ta naglugan iti Mariano Marcos State University ken nagpaitulnog iti Catherdral no sadinno a siningir ti driver ti P30.00, banag met a nagpungtutan na.
Inistorya ti bise mayor ti nagbalin nga experience na kabayatan ti session iti konseho ditoy ciudad ti Laoag nga inatendaran dagiti tricycle driver a nairenew iti prangkisa na.
Inpetteng na a nakaipalaon iti linteg a no 2-3 a kilometro iti kaadayona aglalo no estudyante ti aglugan ket masapol a 20 a pisos laeng ti plete a singiren ti tricycle driver.
Kuna na nga ad-adda pay nga aprisyaren dagiti pasahero dagiti driver a saan nga agdawdawat isut gapuna nga adda dagiti boluntaryo a mangnayun lattan ti plete na idinto a dagiti dadduma ket saan dan a dawaten ti suplida.
Inpaganetget ti bise mayor a no kastoy ti ar-aramiden dagiti sumagmamano a tricycle driver ditoy ciudad ti Laoag ket mapilitan da a mangibabawi iti naited kadakuada a franchise.
Inpalagip na a dagiti franchise dagiti tricycle driver ket libre nga inpaay iti gobierno isut gapuna a masapol a sayaaten da nga usaren aglalo ket isu ti pangbibiag da iti pamilya da.
Kabayatanna, inpakaammo ni Fariñas nga addan to ti panagikabilda iti grievance report kadagiti tricycle tapno maireport a dagus kadakuada no adda dagiti abusado a driver ken matratar da nga insigida.
