LAOAG CITY – Kalikagum ni Laoag City Vice Mayor Vicentito Lazo a paimbestigaran ti operasyon dagiti Small Town Lottery ditoy ciudad.
Daytoy ket kalpasan a naipasa iti maikadwa ken maudi a pannakabasa na ti maysa nga ordinansa a mangimbestigar iti nasao nga operasyon.
Namunganay ti nasao nga ordinansa gapo ta adda iti discrepancy a nakita ni Lazo kadagiti remittance wenno share seknan iti income dagiti pagsugalan.
Naamoan a P25,000 ti irem-remit ti STL kumpara ti P86,000 nga iremremit ti Lotto iti kada bulan.
Inbatad ni Lazo a ti operator ti STL ket Lucky Pick Amusement and Development Inc.
Kunana pay nga addan ti nasao a korporasyon idi nangrugi ti STL ditoy Ilocos Norte idi 2007.
Naamoan a maysa ti probinsya kadagiti pilot provinces a nangtesting ti nasao a sugal.
Rumrumuar iti report ni Mr. Geomedes Gayban, ti City Treasurer a ti laeng adda a rekord da iti nasao a paay-ayam ket idi tawen 2016.
