LAOAG CITY – Naglikudan ni Vice Mayor Victor Racimo iti ili ti Vintar nga aggatgatang isuna ti baboy manipud kadagiti backyard hog farmers tapno iligal nga iruwar na ditoy probinsya.
Segun kenni Racimo, gagangay a gumatang ti baboy gapo ta agparparti dagiti annak na para ilako da iti tiendaan ken no saan a gumatang ket maibus ti suplay iti piggery farm na.
Inpetteng na a ti gatgatangen na a baboy ket maideretso iti slaughter house ken mapaneknekan daytoy dagiti agbanbantay.
Malaksid iti daytoy, kunana a no dadduma ket adda pay ti gatgatangen da a baboy a naipondo iti slaughter house nga aggapo iti away ken isu ti maparti.
Inpasigurado ni Racimo nga isuna ti kaunaan iti ili ti Vintar ita nga addaan ti permit wenno idi pay laeng Enero 5 no sadinno a mapalubusan a mangiruar iti baboy manipud ditoy probinsya.
Inlawlawag pay ti bise mayor a regular nga adda aggapo iti Provincial Veterinary Office nga agimbentaryo iti farm na ken awan met ti maduktalan kuma nga anomalya rason a saan na nga ammo no apay nga adda ti rumrumruar a kastoy a report.
