LAOAG CITY – Inbatad ni Vice Mayor Windel Chua iti siudad ti Batac a dagiti walo a bus a nagluganan dagiti atleta iti Department of Education iti siudad a nakipagpaset ti Region 1 Athletic Association (R1AA) Meet ket iti laeng Ilocos Norte ken Ilocos Sur ti pagoperaran na.
Nupay kasta, kuna ti bise mayor a masapol koma a nangipaay ti konsiderasyon ti Land Transportation Franchising and Regulatory Board iti San Carlos City, Pangasinan ken dagiti enforcers.
Inlawlawag na nga iti baet a ti laeng rumbeng a pagoperaran dagiti bus ket iti Ilocos Norte agingga iti Ilocos Sur, inkosiderar koma lattan dagiti enforcers gapu ta dagiti atleta ti naglugan kadagitoy.
Mainaig iti daytoy, inpakaammo ni Vice Mayor Chua a naituding a makisarita ni Mayor Albert Chua iti Department of Education iti siudad seknan iti nasao a pasamak.
Mangnamnama ti bise mayor a saanen a maulit ti napasamak, kagiddan ti panagyaman na iti gobierno lokal iti siudad ti San Carlos iti probinsya ti Pangasinan gapu iti panangtulong da kadagiti atleta da.
