LAOAG CITY – Nangikabil ti “not guilty plea” ni Vice President Sara Duterte kontra iti pito nga articles of impeachment a naipila kontra kenkuana.
Daytoy ti linaon ti 35 a panid nga answer ad cautelam wenno answer with caution kas panangsungbat iti summon ti Senate Impeachment Court.
Iti sungbat ti summon ni Vice President Duterte ket kalikagumna nga ipabasura ti maikapat nga impeachment complaint nga inpila kontra kenkuana gapu ta maikanniwas iti one-year ban rule.
Gapu iti daytoy, inawagan nga “scrap of paper” wenno basura ni Duterte ti impeachment complaint nga inpila kenkuana ti House of Representatives.
Inpettengna nga awan ti articles of impeachment a nakapila ita iti impeachment court kalpasan a naisubli dagiti kaso iti Kamara.
Inpaganetgetna iti sungbat iti summon a saan a nailawlawag ti Kamara no kasano a nagbalin nga high crime ken nagbalin nga impeachable offense ti maipagarup nga assassination plot-na kontra kada Presidente Ferdinand Marcos Jr., First Lady Liza Araneta-Marcos ken House Speaker Martin Romualdez.
Kabayatanna, karaman pay ti panangakusar iti panagusar ti Bise Presidente ti confidential funds ken ti maipagarup a confidential wealth-na ket agpapada a saan a factual ken awan ti nadagsen nga ebidensia.
