LAOAG CITY – Ginutigot ni Vice President Sara Duterte dagiti Pilipino nga ipateg ti tunggal maysa ita a Christmas season, kangrunaan na dagiti nakukurapay ken masaksakit.
Iti mensahe ti bise presidente, kuna na nga ita a paskua ket maaw-awagan ti amin tapno mamakawan ken ipateg ti pada a tao.
Inrakurak na pay a ti pannakaiyanak ni Hesu Kristo ket maysa a mensahe ti panagpipinnakawan a mangipakita iti awan makaartap a panagayat ti Diyos iti amin.
Innayon na nga usaren a pagibasaran kas inspirasyon ti pannakilangen iti pada a tao kangrunaan na ti pamilya ken dagiti ipatpateg iti biag.
Mainaig iti daytoy, kuna ti bise presidente a malaksid kadagiti materyal a regalo ket masapol nga ipaay pay dagiti Pilipino ti naan-anay a pannakaawat ken respeto iti tunggal maysa gapu ta iti isu ti pudno nga anag ti paskua.
