LAOAG CITY – Kiniddaw ni Vice President at Education Secretary Sara Duterte iti panagatendar na iti graduation iti maysa a pagadalan iti Mangaldan, Pangasinan nga ipateg dagiti estudyante dagiti nagannak da nga agsaksakripisyo tapno magun-od da ti bunga ti panagrigrigat da.
Iti panagbitla na kas keynote speaker iti commencement exercise, pinadayawan ti bise presidente dagiti nagannak iti suporta da kadagiti annak tapno magun-od dagiti arapaap da.
Inbatad pay ni Duterte a ti panagturpos dagiti estudyante ket saan laeng a para kadakuada no di ket para pay kadagiti nagannak ken dagiti mangisursuro.
Inlawlawag na a ti graduation ket para kadagiti nagannak ken mangisursuro gapu ta nagrigat da no sadinno a dagiti luwa, dara ken ling-et da ti makaigapu no apay a nadanun dagiti estudyante ti ayan da iti agdama.
Binalakadan pay ti bise presidente dagiti estudyante mainaig iti rumbeng a panangsango da kadagiti karit iti biag.
Inpalagip na a ti tao a nagpasar ti sakit, pannubok ken pannakapaay ket isuda dagiti ado ti masursuro na ken adayo ti madanun na.
