LAOAG CITY – Linagip ni Vice President Sara Duterte ti biag ken espiritu ti national hero a ni Dr. Jose Rizal iti nagbalin a rakurak na ita nga aldaw para iti pananglagip ti kinabanuar na.
Segun ken ni Duterte, iti babaen dagiti insurat ni Rizal ket naipatawid kadagiti Pilipino ti awan panagbuteng a panagayat iti pagilian ken arapaap iti biag a pudno a wayawaya a naibasar iti kinalawag dagiti ammo.
Inpetteng ti bise presidente a ti adal ni Rizal ket nalawag, ti wayawaya ket saan laeng a wayawaya manipud kadagiti ganggannaet a puwersa, no di ket ti pannakawayawaya ti panunot ken emosion manipud iti pannakaabuso, saan a panagkaykaysa, ken kinadakes.
Iti mensahe na, ginutigot ni Duterte dagiti Pilipino nga isubli ti pigsa ken kinatured tapno tumakder iti kinapudno ken hustisya.
Innayon na a saan a rumbeng nga ipalubos a matay ti espiritu ti sirib ken panagkaykaysa nga inlaban ni Dr. Jose Rizal.
Dinakamat pay ti bise presidente a ti pudno ket napaot a panagbalbaliw ket mangrugi iti nauneg a panagadal, moral nga integridad ken sangsangkamaysa a panagtignay iti komunidad ken dagiti institusyon.
Inpalagip pay ni Duterte ti kinapateg ti panangipateg ti pagilian, para iti Diyos, iti ili ken ti tunggal Pilipino kas panangraem iti espiritu ni Dr. Jose Rizal.
