LAOAG CITY – Manamnama nga isumitir ni Vice President Sara Duterte ti sungbat na intono Lunes, Marso 16 iti dua nga impeachment complaints kontra kenkuana kalpasan a naideklarar nga adda ti umdas a porma ken substansya.
Inrakurak ni House Committee on Justice member ken Bicol Saro Representative Terry Ridon a malpasen ti 10 nga aldaw nga inpaay ti komite iti Bise Presidente tapno sungbatan dagiti reklamo kontra kenkuana.
Kuna na a no maisumitir ti bise presidente ti sungbatna ken ikkan da ti gundaway dagiti agpanpanday linteg a nangiyendorsar kadagiti impeachment complaint kalpasan na ket maipaayan met ti gundaway ni Duterte a a mangisumitir ti rejoinder na.
Kabayatanna, inpetteng ni Rep. Ridon a no mangisumitir ti sungbat ti Bise Presidente, establisaren ti Justice Committee no “sufficient in grounds” ti impeachment complaints ken namnamaen a maisayangkat ti hearing proper intono Abril 8 ita a tawen.
Inlawlawag pay ti agpanpanday linteg a mabalin a maiyababa ti agbalin a taray ti impeachment process no saan a mangisumitir ti sungbat ti bise presidente intono lunes.
Naiget met a naglikudan ti agpanpanday linteg ti akusasyon ni Vice President Duterte a maysa a “fishing expedition” ti impeachment proceedings kontra kenkuana.
Kabayatanna, naikeddeng a maisayangkat ti sumaruno a panagdengngeg ti Justice Committee intono Miyerkules, Marso 18.
Inpakaammo ni Rep. Ridon, a matratar iti daytoy nga aldaw ti mosyon ni Rep. Chel Diokno mainaig iti possible a conflict of interest ti dua nga abogado ni Vice President Duterte a da dati nga Education Assistant Sec. for Procurement Atty. Reynold Munsayac ken dati a Department of Education Spokersperson Michael Poa.
