LAOAG CITY – Nangiruar ni Vice President ken Education Secretary Sara Duterte maipanggep iti sakit ti nakem kenkuana ni First Lady Liza-Araneta-Marcos.
Segun iti bise presidente, kas maysa a tao, adda ti karebbengan ti First Lady a makarikna ti sakit ti nakem ken busor.
Nupay kasta, ti personal a marikriknana ket awan ti pakainaigan iti trabahona kas bise presidente.
Gapu iti daytoy, agsaritanto lattan iti pribado iti nagbaetanda ken ni Presidente Ferdinand Bongbong Marcos Jr.
Inpaganetget ni Duterte nga imbes ket ikkan ti naan-anay nga atension dagiti kangrunaan a parikot a sangsangoen ti pagilian.
Maipalagip nga inadmitir ni First Lady Liza Araneta-Marcos a nasakit ti nakemna ken ni Vice President Sara gapu iti saanna a panangdepensa ken ni Presidente Marcos Jr. kontra kadagiti pammabalaw ni dati a Presidente Rodrigo Duterte.
Nasaktan daytoy idi nagatendar ti Bise Presidente iti maysa a rally no sadino inakusaran ti ama daytoy ni Presidente Marcos Jr. a “bangag.”
Simmakit ti nakem ti First Lady idi makitana a nagkatawa ni Vice President Sara iti dinakamat ti dati a Presidente.
Kabayatanna, kinuna ni First Lady Marcos a rinantana a saan a pansinen ti bise presidente kadagiti sumagmamano nga okasion tapno ipakita ti sakit ti nakemna ngem nupay man bad shot kenkuanan ti bise presidente ket mabalin pay laeng a maiplastar ti nagbaetanda.
