LAOAG CITY – Inpasigurado ni Vice President Sara Duterte nga awan ti plano na a bumaba iti pwesto kas maikadwa a presidente iti pagilian ken agtalinaed a naurnus ti relasyon da ken ni Presidente Ferdinand ‘Bongbong’ Marcos Jr.
Inrakurak daytoy ti bise presidente kalpasan ti panagikkat na kas miembro iti gabinete ni Presidente Marcos, panagikkat na kas sekretaryo ti Department of Education ken Vice Chairperson ti National Task Force to End Local Communist Armed Conflict (NTFELCAC).
Inpasigurado na nga iti agdama ket nakatutuk ni Duterte iti Office of the Vice President (OVP) ken kas pammaneknek ket adda ti nakalinya a 10 a proyekto da.
Inadmitir ni Duterte a malidayan iti panagbaba na iti pwesto kas sekretaryo ti Department of Education gapu ta nagbalinen a napateg kenkuana ti trabaho na iti daytoy.
Nupay kasta, inkalintegan na a nagdesisyon a bumaba iti pwesto para iti pagsayaatan ti Department of Education.
Immunan nga inbatad ni Duterte a nagtalinaed da nga agpagayam ken ni Presidente Marcos.
