LAOAG CITY – Maiyuswat ti victory concert ti Nasudi Chorale ti Mariano Marcos State University inton Enero 29 iti oras ti alas tres ti malem iti Teatro Ilocandia iti siudad ti Batac.

Daytoy ket kageddan ti pannakarambak ti maika-47 a Founding Anniversary iti nasao nga unibersidad.

Segun ken ni Mr. Vince Louisse Salacup, Conductor ti MMSU Nasudi Chorale, ti orihinal a plano a pannakaisayangkat ti victory concert ket idi Nobiembre iti napalabas a tawen ngem gapu kadagiti nagsasaruno a bagyo a dimmuprak ditoy pagilian ken probinsia ket naitantan daytoy.

Inbatadna a daytoy ti maikadua a concert nga isayangkatda no sadinno ti immuna a concert-da ket idi Mayo 31 iti napan a tawen.

Inlawlawagna a daytoy a concert ket kas panangrambak iti pannakagun-odda ti balligi idiay New Zealand.

Kunana a dagiti kangrunaan a kantaenda ket dagiti piyesa nga inpabuyada iti international competition kas ti Song of Salvation, Sing to the Lord, Glorifying the Lord ken dadduma pay.

Mainaig iti daytoy, inpakaammo ni Salacup a ti nasao a concert ket silulukat para iti amin, available ti tickets inton bigat, Enero 13, para iti VIP tickets nga agbalor ti sangaribu a pisos, para iti Guests ket 500 a pisos, adda ti maidiaya a diskuento para kadagiti mangisursuro a 300 a pisos idinto a 100 a pisos para kadagiti agad-adal.

Innayonna a ti last show ket inton Enero 30 iti oras ti alas siyete ti rabii.

Kabayatanna, naammoan a ti nadakamat a concert ket napauloan ti “Illustris: Towards Greater Heights.”