LAOAG CITY – Inbatad ni Police Capt. Jofel Pascual, ti chief of police iti ili ti Vintar a nagsardengen ti baket nga agpalpalapal kadagiti behikulo kangrunaan na dagiti nakamotorsiklo a lumabas iti sango ti balay iti Pallas Valley iti nasao nga ili.
Segun ken ni Pascual, dagiti agwarwaras a video iti online ket nabayagen a napasamak dagitoy.
Inlawlawag na nga idi kapaspasamak dagitoy nga insidente ket adda dagiti nangireklamo iti baket iti barangay ngem saan metlaeng nga intuloy dagiti maseknan ti reklamo da gaputa maasyan da iti baket aglalo ket agmaymaysan nga agbibiag.
Kuna pay ti opisyal nga uray dagiti kabagyan ti baket ket saanna a kasurutan gapu iti ar-aramiden na ken kaap-apa na pay dagitoy.
Inpakaammo na a ti ar-aramiden na ket masansan na a mapan na kasarita ti baket a saannan nga aramiden ti agpalapal kadagiti aglabas a motorista amangan no balsenda daytoy.
Innayon na a kanayun na pay nga ibalakad iti baket tunggal agkita da nga agaramid ti nasayaat kadagiti pada na a tao tapno adda ti tumulong kenkuana.
Mainaig iti daytoy, inpaganetget ni Pascual a ti naamoan na a kagura unay ti baket ket dagiti napaspas a motorsiklo a lumabas iti sango ti balayna.
