LAOAG CITY – Inpakaammo ni Ms. Joy Martinez, iti Vietnam a nagrekep dagiti disco, massage parlor, bars, ken dadduma pay malaksid kadagiti restaurant ken shopping malls.
Daytoy ket gapu pay laeng iti agtultuloy a pannakapasar da iti COVID-19 pandemic.
Kuna na a naipatungpal ti nasao nga addang idi rabii ti Biernes iti nasao a pagilian kontra iti possible ti panagwaras ti COVID-19.
Inbatad ni Martinez, a naikairekord ti Vietnam iti 14 a baro a kaso ti COVID-19 no sadino a 10 kadagitoy ket naggapu iti pagilian nga India idinto a dagiti uppat ket lokal a residente manipud iti sumagmamano a probinsya.
Segun kenni Martinez, dagus a naipan iti ospital dagiti 10 a residente kas protocol iti nasao a pagilian.
Basar iti kaudian a datus manipud iti Johns Hopkins University, umaboten iti 2, 942 kalpasan a nairekord dagiti 14 a kaso, 2,548 dagiti nalaingan idinto a agtalinaed a 35 dagiti pimmusay.
Kuna ni Martinez, a sakbay pay a nairekord dagiti baro a kaso ket nagtalinaed a 2,928 ti kaso sipud nangrugi iti pandemiya.
Kabayatanna, inpakaammo na a dagiti frontliners pay laeng ti nabakunaan usar iti AstraZeneca vaccine agraman dagiti naggapu iti sabali a pagilian.
