LAOAG CITY – Inpakaammo ni Sangguniang Panlalawigan Member Dr. Medeldorf Gaoat, Chairman ti Committee on Health a mapagbalin a Primary Infirmary Health Care ti Vintar District Hospital.
Segun kenkuana, ti Vintar District Hospital ket maibilang pay laeng kas Rural Health Unit wenno RHU no sadino ti operasionna ket mangrugi ti alas 8 ti bigat agingga alas 5 pay laeng ti malem.
Gapu iti daytoy, kunana a manarimaan ti panangikagumaan ti Gobierno Probinsial a mapagbalin a Primary Infirmary Health Care ti nadakamat nga ospital.
Inlawlawagna a maibasar ti resolusion manipod iti Vintar District Hospital ket kasapulanda ti 28 a medical staff and personnel kas ti 1 a medical physician, 13 a nurse, 3 a nursing aide, 2 nga administrative aide, 3 a medical technologist, 2 a pharmacist, 1 nga administrative officer, 1 nga admin assistant, 1 nga ambulance driver ken 1 a destista.
Inbagana nga iti agdama ket adda laeng 7 nga hospital staff ti Vintar District Hospital pakairamanan ditoy ti 1 nga Officer In Charge Chief of Hospital, 2 a nurse, 2 a nursing aide, 1 nga admin aide ken 1 nga ambulance driver banag a makita nga agkurkurangda ti empleado para iti serbisio medikal.
Maipalagip a nagkiddaw ti Vintar District Hospital iti Department of Health maipanggep ti kaadda ti maiturong a mai-deploy wenno madutukan kadagiti doctorless barrios iti district hospital ken naiturong daytoy kada DOH Officer-in-Charge, Undersecretary, Ma. Rosario Vergerie ken ni DOH Regional Director Dr. Paula Paz Sydiongco.
Innayon ni Dr. Gaoat nga addan ti immunan a panagpasiar ti DOH ken panangdakamatda ti boluntario a panagkalikagum ti DOH a tumulong babaen iti pannakai-deploy iti doctorless barrios tapno mapasayaat ti operasion dagiti district hospitals a maibilang pay a maysa kadagiti kasapulan tapno mapangato ti level ti PhilHealth Accreditation ti nasao a district hospital.
