LAOAG CITY – Naan-anayen a nagbalin a Primary Care ken Birthing Facility ti Vintar District Hospital babaen ti panagkikimmayyet ti Provincial Government of Ilocos Norte ken ti Local Government iti ili ti Vintar iti panangidaulo ni Mayor Richard Agregado Degala.
Daytoy ket kalpasan a naipaulog manen ti lisensya nga agoperar ken naaprobaran ti panagbalin ti Vintar District Hospital kas primary health care ken birthing facility, babaen iti Department of Health.
Immun-unan ngem iti daytoy ket nagkipagsaritan dagiti pannakabagi ti ospital ken ni Mayor Degala iti opisinana no sadinno a kiniddawda ti kanayunan a nurses ken driver/utility personnel.
Pinatgan met ti Mayor daytoy no sadinno nga adda mamnama a ma-ideploy a tallo a nurse ken maysa a driver/utility personnel iti munisipio tapno agpaay dagitoy iti Vintar District Hospital.
Mainaig iti daytoy dagus kiniddaw ni Mayor Degala iti Sangguniang Bayan iti nasao nga ili a mangipasada iti maysa a resolusyon para iti nayon a pwersa nga agpaay iti nasao nga ospital.
Kabayatanna, aglap-lapunusan met ti panagyaman ti Mayor iti pannakaited iti naan-anay a lisensya nga agoperar ti nasao nga ospital, ken inpasigurado na nga agtultuloy ti pannakibinnulig na iti gobierno probinsyal para iti pagsayaatan dagiti umili iti imatmatunan na nga ili.
