LAOAG CITY – Inpakaaammo ni Mayor Richard Degala nga iti ili ti Vintar ket maysa kadagiti maapektaran gapu iti isyu ti flood control projects ditoy pagilian.
Inbatadna a nadakamat ni Cong. Sandro Marcos kenkuana nga awan pay laeng ti mailatang a pundo para iti flood control projects iti lugarda.
Nupay kasta, mangnamnama ni Mayor Degala nga addanto met laeng maiyalokar a pundo para iti daytoy inton sumaruno a tawen.
Kunana a saan a mailinged a dakkel ti epektona kadagiti mannalon ti agdama a mapaspasamak nga imbestigasion iti anomalya iti flood control projects.
Kabayatanna, inpadanon ni Degala ti napalaos a panagyamanna iti kongresista kalpasan nga adda ti naawatda nga ambulansia manipud iti Philippine Amusement and Gaming Corporation iti kallabes ken ti naudi ket ti baro a patrol car a maipaay met iti Vintar Municipal Police Station.
