LAOAG CITY – Maisayangkat intono Abril 27 ti “virtual employment coaching” a pagbinnuligan ti gobierno probinsial ken ti Department of Labor and Employment wenno DOLE.
Segun ken ni Mrs, Anne Marie Lizette B. Atuan, manager ti Provincial Public Employment Service Office wenno PESO, nangrugin ita nga aldaw ti pre-registration kadagiti interesado a kakailian a makipaset iti nasao nga aktibidad.
Inlawlawagna nga inlungalong ni Gob. Matthew Marcos Manotoc a maiyuswat daytoy nga aktibidad tapno maammoan dagiti kakailian no kasano ti agaplikar iti trabaho iti man local wenno iti ballasiw taaw.
Imbatadna a libre ti pannakaisayangkat ti nasao nga aktibidad babaen iti “zoom”.
Kunana a mangrugi ti nasao nga aktibidad iti oras ti alas nuebe ti bigat ken agpatingga iti oras ti alas dose ti aldaw.
Segun kenkuana, maiyaw-awis kadagiti amin a kakailan kangrunaanna kadagiti katurturposda iti panagadalda ken dagiti kapaspasada ti board exam ti makipartisipar.
Kabayatanna, inpakaammo ni Atuan nga adda ti maisayangkat a “career counseling” para kadagiti “junior” ken “senior high school” intono Abril 26.
Inbunannagna a ditoy a kabinnulig ti gobierno probinsial dagiti amin a Local Government Units ditoy probinsia.
Mainaig iti daytoy, imbatadna nga umabot iti innem a gasut nga estudiante dagiti manamnama a makipartisipar.
Innayonna a naimbitaran ti Department of Education wenno Dep. Ed. ken ti Ilocos Norte Youth Development Office wenno INYDO a mangilawlawag no ania dagiti napintas a kurso ken trabaho tapno maliklikan ti “mismatch” iti pagserkan a trabaho.
