LAOAG CITY – Mamati ti National Bureau of Investigation a mabirukan ken maarestarda ditoy Pilipinas ti negosiante a ni Charlie “Atong” Ang.
Basar iti National Bureau of Investigation, adda pay dagiti dadduma a lead a sursuroten ti ahensia tapno mabirukan ti number 1 most wanted person a gaming tycoon.
Rinugian ti National Bureau of Investigation a sukimaten dagiti sumagmamano a lugar iti Visayas ken Mindanao a basar iti maaw-awatda nga impormasion.
Nupay kasta, saan pay laeng nga inbuksilan dagiti detalye ti National Bureau of Investigation ti iwaywayatda nga operasion.
Naammoan nga iti naudi nga operasion ti National Bureau of Investigation iti Metro Manila, napaay a mabirukan ni Ang iti dua a pagtaengan iti maysa nga exclusive subdivision idiay Makati City a maipagarup a pagnanaedan dagiti anak ti negosiante.
