LAOAG CITY – Maysa a babai a visual artist idiay Ivory Coast ti bimmida iti benneg ti arts kalpasan a nakaaramid isuna ti 130 portrait iti uneg laeng ti 120 oras.
Ni Mylène Françoise Amon, am-ammo kas portraitist ket nangipakita ti kinalainga manipud idi Pebrero 5 agingga idi Pebrero 10, 2025 iti BAE stadium iti Yopougon, ti kaaduan a munisipalidad iti Abidjan.
Ti obra daytoy ket nakaala ti naan-anay nga atension manipud iti media ken publiko nangruna ket inkarigatanna nga artapan ti dati a rekordna a 100 portrait.
Inusar ni Amon ti Papy-art, maysa a teknik ti optical illusion babaen ti papel tapno makapartuat kadagiti obrana.
Iti baet a kalikagumna a makaaramid ti 150 a pedaso nagbalin a lapped ti panagbaliw ti sasaaden ti panawen rason iti pannakaibayag ti trabahona.
Nupay kasta, saan a simmuko ken iti tulong ti maysa pay nga oras a pannakaiyalud-od ket balligi a nalpasna ti 130 a portrait.
Naammoan a daytoy nga inisyatiba ket adda ti naun-uneg a gagem no sadinno nga amin a maukkon manipud iti panaglakona kadagiti inaramidna tapno tulungan dagiti ubbing nga addaan ti sakit a kanser iti pannakibinnulig ti Ministry of Health ti Ivory Coast.
