LAOAG CITY – Naiget nga ad-adalen ti Presidential Communications Office (PCO) ti progama tapno i-accredit dagiti vloggers kadagiti Malacañang coverages.
Daytoy ti inbatad ni Presidential Communications Office Secretary Cheloy Garafil kadagiti miyembro ti Commission on Appointments iti pannakaiyuswat ti confirmation hearing na.
Inkari na nga apaman a malpas ti naiget a panangadal da ket ipublikar da a dagus ti desisyon da.
Maipalagip nga inlungalong ni dati a Press Secretary Trixie Cruz-Angeles, ti accreditation dagiti vlogger iti Malakanyang no sadinno nga inpetteng na a paset daytoy iti prayoridad da.
Saan a mailibak a dakkel ti nagbalin a papel dagiti vlogger idi panawen ti presidential campaign ni Presidente Ferdinand Marcos Jr., no sadinno nga adda ti sumagmamano a naipaayan ti priority access iti dayta a gundaway.
Ti access iti Malacañang coverage wenno Palace events ket tradisyonal a limitado laeng dagiti agatendar a journalists wenno kameng ti media manipod iti TV ken radio networks, online news outfits, ken newspapers.
Maipalagip nga idi 2017 ket inpalubos ni Presidential Communications Operations Office Secretary Martin Andanar ti accreditation dagiti napili a social media users iti babaen ti maysa a department order.
