LAOAG CITY – Inpanamnama ni Vice Mayor Albert Chua iti ciudad ti Batac a saanen a maulit ti napasamak a pannakauram ti merkado publiko iti nasao a ciudad.
Daytoy ket gapu ta adda dagiti naipalaon iti plano para ti maipasdek a baro a tiendaan iti ciudad ti Batac dagiti nagduduma a banag a dakkel a makatulong tapno maliklikan ti uram.
Maipalagip nga iti ibibisita ni Presidente Ferdinand Marcos Jr. iti ciudad ti Batac iti kallabes partikular iti nauram a tiendaan ket nangipaay ti 150-milyon a pisos a pondo a mausar para iti pannakaipatakder ti baro a merkado publiko ti nasao a ciudad.
Kuna na a naamoan na a dagiti baro a probisyon ti building ken fire code a naipalaon iti development plan ti maaramid a baro a tiendaan ti ciudad, a maibilang kas high technology a maikonektar amin kadagiti ahensya ti gobierno a makapagtitinnulong iti panawen ti didigra wenno kalamidad, ket agserbi kas preventive measure.
Mainaig iti daytoy, inpakaammo ti bise mayor a maibasar iti development plan ket umabot iti 400 a milyon a pisos ti kasapulan tapno naan-anay a maipasdek ti baro a tiendaan iti ciudad t Batac.
Nupay kasta, kunana nga adda ti pammilin ni Presidente Marcos Jr. nga ipatungpal da paylaeng ti pakaanayan ti P150-milyon a pisos, ta iti sumaruno a phase ket isunto manen ti panangipaay ti opisina na ti nayun a pondo.
