LAOAG CITY – Inpanamnama ni Vice Mayor Maynard Francis Bumanglag iti ili ti Pinili ti naruay a programa kagiddan iti pormal a panagsapatana kas Presidente ti Vice Mayors League of the Philippines.
Segun kenkuana, naan-anayen a nairubuat ti digital repository of ordinances wenno ti maaw-awagan nga E-legis.
Inbatadna a daytoy ket nadisenio a mangipalubos kadagiti lokal a gobierno a ma-access, mangibinglay ken mangadal kadagiti pagalagadan manipud kadagiti dadduma nga hurisdiksion.
Kunana a babaen iti daytoy ket ad-adda a mapalag-an ti trabaho dagiti agpanpanday linteg.
Malaksid iti daytoy, iti pannakaitultuloy ti pannaka-convert ti conventions-da kadagiti amin a Bise Mayor ditoy Pilipinas iti short courses tapno saan a masayang ti pundo ti gobierno ken mausar ti umno a pakausaranna.
Immuna iti daytoy, indauloan ni Presidente Ferdinand Marcos Jr. ti panagsapata ken ni Bumanglag kas baro a naelektaran a Presidente ti Vice Mayors League of the Philippines iti Malakanyang.
