LAOAG CITY – Binabalaw ni Vice Mayor Rey Carlos Fariñas ti oras ti panag-fumigate dagiti barangay ditoy siudad ti Laoag.
Daytoy ket kalpasan a nakitana ti nakaro nga asok iti paset ti centennial arena iti oras ti rush hour.
Segun ken ni Vice Mayor Fariñas, nagbalin a problema daytoy gapu ta nangrugi ti panag-fumigate iti alas-siete iti bigat no sadinno a naruay dagiti tattao nga aglabas kangrunaan dagiti motorista iti Ablan avenue.
Kunana a rumbeng a maikonsiderar ti umno nga oras ti panag-fumigate tapno maliklikan ti panagbuteng ken panagdanag dagiti tattao, nangruna no ti asok ket makita manipud iti adayo nga arigna ket adda ti dakkel nga uram.
Gapu iti daytoy, kiniddawna ken ni Liga ng mga Barangay President Rbee Ablan, nga adalenda ti umiso nga oras ti panag-fumigate, saan ketdi a maaramid daytoy no rush hour a mabalin a mangpataud iti panagpanic dagiti umili.
Innayonna a masapol ti umno a pannakaadal ti umiso a time window para iti panag-fumigate, tapno saan a makaistorbo iti panagdalyasat dagiti tattao.
