LAOAG CITY – Binalakadan ni Vice Mayor Rey Carlos Fariñas dagiti padana a public officials ditoy siudad ti Laoag a masapul nga agbalin a responsable kadagiti pundo wenno kuarta nga aggapu iti gobierno.
Daytoy ket iti baet a nabara a mapagsasaritaan iti agdama mainaig iti korapsion ditoy pagilian kangrunaanna kadagiti sumagmamano a barangay ditoy siudad a maipagarup a saan nga husto ti pannakabusbos ti pundo ken inbulsa dagiti kurakot.
Inbatad ni Fariñas a no kayat ti maysa nga indibidual ti bumaknang ket saan a mabalin nga usaren wenno takawen ti kuarta ti gobierno no diket rumbeng nga agtrabaho tapno rumang-ay iti panagbiag.
Inlawlawagna nga isuda a public officials ket naikkan ti tallo a tawen a panagturay tapno ditoy nga ipakita ti talek nga inpaay kadagiti nangibutos kadakuada.
Kunana a daytoy a talek ket mabalin a maburak no kastoy ti ar-aramiden ti maysa nga agpanpanday linteg.
Innayonna a no agtultuloy a mapaspasamak ti panagkunniber ditoy pagilian ket dagiti annak wenno agtutubo ti agsagrap ti dakes nga epektona daytoy.
Maipalagip nga adda dagiti sumagmamano a barangay ditoy probinsia ti naduktalan a maipagarup a saan a nausar a naimbag ti pannakabusbos ti pundo ti barangayda.
