LAOAG CITY – Kalikagum ni Vice Mayor Rey Carlos Fariñas ditoy siudad ti Laoag a maipublikar amin dagiti bakante a posision ditoy siudad ti Laoag.
Segun kenkuana, daytoy ket kalpasan a maobserbaranna kadagiti sumagmamano a departamento a kurang ti manpower wenno empleado no sadino ket arig aramiden ti maysa nga empleado ti trabaho ti tallo nga empleado.
Inbatadna a babaen iti panangipasada ti maysa a resolusion ket maobligar ni Mayor Michael Marcos Keon a lukatanna daytoy iti publiko nangruna para kadagiti kualipikado nga empleado iti bakante a posision.
Kunana a nasken a malitupan dagiti bakante a posision tapno saan a kakaasi dagiti agpapaay nga empleado ti lokal a gobierno.
Innayonna a masapol a matratar ken maadal daytoy a naimbag tapno matulungan dagiti maseknan nga empleado a madagsenan ti kinaadu ti trabahoda.
