LAOAG CITY – Kalikagum ni Vice Mayor Rey Carlos Fariñas ditoy siudad ti Laoag a mapaalisto ti pannakaplastar dagiti kagamitan a masapol iti Intensive Care Unit ken Emergency Room iti Laoag City General Hospital.
Daytoy ket kalpasan ti maysa a nagbalin a kapadasanna kas maysa nga ama nga intarayna a dagus ti anakna iti Black Nazarene Hospital iti ili ti San Nicolas.
Inlawlawagna a saanna nga intaray iti Laoag City General Hospital ti anakna gapu ta ammona a saan pay nga agop-operar ti Intensive Care Unit ken Emergency Room iti nasao nga ospital gapu iti kinakurang dagiti maus-usar a ramit a pangtaming.
Mainaig iti daytoy, kunana nga addan ti panangipakaammona daytoy a banag ken ni Dr. Marsha Lou Wapan, Officer In Charge ti Laoag City General Hospital a mapaalisto ti pannakaplastar dagiti ramit a masapol tapno adda met laeng asideg a pagtarayan dagiti pasiente.
Kabayatanna, inpasingked ti Bise Mayor a dagitoy ti maysa kadagiti kangrunaan nga ipangpangrunana tapno mapapintas iti pannakaipadanon ti serbisio medikal para kadagiti pasiente.
