LAOAG CITY – Kiniddaw ni Vice Mayor Rey Carlos Fariñas a pagtalinaeden ti respeto iti ti tunggal agpam-panday linteg ditoy siudad ti Laoag, kalpasan ti viral a napasamak idiay Reyna Mercedes, Isabela.
Namunganay daytoy iti napasamak a panabibinnugkaw iti nagbaetan ti bise mayor ken dagiti sumagmamano nga opisial iti Reyna Mercedes, Isabela.
Gapu iti daytoy, kinunana a saan a nasayaat daytoy nangruna iti uneg ti Sangguniang Bayan, no sadinno a masapol a masurot ti husto a decorum iti panagserbi iti publiko.
Kinunana a mabalin a mangitunda daytoy ti frustration no agtultuloy ti saan a panagkikinnaawatan dagiti opisial.
Inbatadna a kasapulan ti panagsisinnabat dagitoy uray pay no adda ti nagdudumaan da ti prinsipio ken adda ti nagbaetan pulitikana.
Impettengna a no kalpasan ti eleksion, napateg a maipangruna dagiti kasapulan ken iwwaksi dagiti personal nga interes wenno napolitikaan a pabor.
Innayonna a saan koma a maapektaran ti panagkakadua ken panagserbida iti publiko iti oras ti Sangguniang Bayan.
Kabayatanna, kunana nga no man adda ti napasamak idi napalabas a Sangguniang debate ngem idinto a nagtugaw daytoy kas bise mayor ket pinilina ti panangipakita ti panagdayaw ken panangipaay ti respeto iti amin.
