LAOAG CITY – Masdaaw ni Vice Mayor Rey Carlos Fariñas no apay awan pay ti nagatang a tow truck ti lokal a gobierno ditoy siudad ti Laoag iti baet a nabayagen a napundoan daytoy.
Segun kenkuana, addan ti nagatang ti lokal a gobierno idi bulan ti Pebrero a tow truck ngem ti nai-deliver ket para laeng kadagiti lugan a truck saan a para iti kotse isu a naisubli daytoy ngem agingga ita ket awan pay ti nagatangda a sukatna.
Inlawlawagna a dati nga addan ti tow truck ti lokal a gobierno ditoy siudad ti Laoag idi panawen ni Roger Fariñas kas Mayor ditoy siudad nga adda ti naidonar a tow truck ngem daytoy ket daanen.
Maipalagip nga iti kallabes ket nagsasaruno dagiti nirespondeanna a desgrasia no sadinno a babaen ti bukudna a tow truck ket alisto ti pannakabagkat kadagiti lugan a karaman kadagiti aksidente.
