LAOAG CITY – Nadismaya ni Vice Mayor Carlos Fariñas ditoy siudad ti Laoag kalpasan ti nagbalin a sungbat ti Department of Public Works and Highways – First Engineering District nga awan ti pundoda para iti pannakaipan ti pedestrian lane iti Community Environment and Natural Resources Office iti Brgy. Barit ditoy siudad.
Nupay kasta, nakigtot daytoy idi adda makitana nga adda dagiti manarimaan ti panagpintada iti pedestrian lane iti paset ti Manila North Road.
Gapu iti daytoy, nalagip ti Bise Mayor ti nagbalin a sungbat ti nasao nga ahensia ti gobierno maipanggep iti panangikagumaanna a maikkan ti pedestrian lane uray iti maysa laeng a paset ti kalsada ti Community Environment and Natural Resources Office.
Mainaig iti daytoy, inlawlawagna a napagnunumoanda iti Sangguniang Panlungsod nga isuda ti mangibaklay ti pannakapapinta ti pedestrian lane kaduana dagiti sumagmamano a kameng ti konseho nga isuda Konsehal Bryan Alcid ken Konsehal Kiko Ang.
Kabayatanna, mamati ni Konsehal Alcid, ti Chairman iti Committee on Transportation a ti nagbalin a rason no apay saan a naikkan ti naan-anay nga importansia ti kiddawda ket posible nga inpagarup ti Department of Public Works and Highways – First Engineering District ket maikkan amin dagiti kalsada nga addaan ti pedestrian lane ti thermoplastic paint.
