LAOAG CITY – Inpakaammo ni Laoag City Vice Mayor Carlos Fariñas a personal a napanna kinasarita ni Mrs. Russel Tungpalan Pimela a nanggabor ti darat iti maysa a dalan iti Brgy. Cabungaan-A ditoy siudad.
Segun kenkuana, inbilinna ti City Engineering Office ken City Assessor’s Office a mangkita ti nasao a parikot tapno maduktan no asino ti adda ti naglabsinganna iti pagannurutan.
Inbatadna a bayat ti pannakisarsaritana iti maseknan ket saanna a maminpinsan nga ikkatan ti pagdalanan ti karirina ngem masapol nga adda dagiti nasken a suruten ken tungpalen ti bangir a partido.
Kunana a masapol a matingiting daytoy a problema tapno saanen a kumaro pay ti nagbaetan ti agsinnumbangir a partido.
Kabayatanna, insingasing ni Sangguniang Panlungsod Member Jason Perera a rumbeng a masurot ti linteg isu a masapol nga ikkatenda ti darat a naigabor iti dalan kas naiyataday iti paglintegan ti pagilian.
Immuna iti daytoy, adda dagiti nagririri kalpasan a nagaboran ti maysa a dalan iti kalsada a nangitunda ti pannakapaayab dagitoy iti Barangay Hall.
