LAOAG CITY – Kalikagum ni Laoag City Vice Mayor Rey Carlos Farinas a maaddaan ti direct flights ti Laoag City to Zamboanga City ken vice versa pakairamanan ti Laoag City to Basilan ken vice versa.
Segun kenkuana, daytoy ket kalpasan a naduktalanna a naruay dagiti naikamang a kailian nga Ilokano kadagiti nadakamat a lugar.
Inbatadna a gapu iti daytoy ket napanunutanna daytoy a wagas tapno al-alisto dagitoy a makaawid wenno makasangpet ditoy Northern Luzon.
Inlawlawagna a bayat ti panagbisitana idiay siudad ti Zamboanga ken Basilan ket naimatanganna ti kinapintas dagiti nasao a lugar nangruna kadagiti maipanpannakkel a tourist attraction dagitoy.
Kunana a mangnamnama daytoy a mapatgan ti nasao a banag iti Department of the Interior and Local Government babaen ti sisterhood signing kadagiti airlines.
Innayonna a mamati daytoy nga apaman a maipatungpal daytoy ket isu ti mangpadur-as ditoy siudad ti Laoag babaen iti ad-adda a makaallukoy kadagiti turista wenno gangannaet.