LAOAG CITY – Nabastusan ni Vice Mayor / Presiding Officer Rey Carlos Farinas iti nagbalin a sungbat babaen iti surat ni Pol Lt. Col. Andrew Rabang, ti chief of Police ditoy ciudad ti laoag.
Daytoy ket maipanggep iti panangdillaw ti bise mayor ti masansan a panangipatungpal ti Philippine National Police ti pannakapaserra dagiti sumagmamano a kalsada ditoy ciudad nga awan ti pammalubos iti konseho ken iti local executive.
Inbatad iti Bise Mayor a nakapalaon ti surat iti nasao nga hepe nga agduma ti reroute ken temporary closure no sadinno a ti inaramid da laeng ket wagas a panangimanihir kadagiti behikulo ken tapno maliklikan ti nairot a trapiko.
Nailanad pay iti surat ti hepe ti pulisya a naipakaammo ti nasao nga aktibidad babaen iti concerned office ngem awan iti aniaman a nagbalin a tignay da isut gapuna nga inaramid da laeng ti trabaho da pakairaman iti seguridad, panangiwanwan ti trapiko nga awan ti aniaman nga intension a pannakaistorbo dagiti biahero.
Segun iti bise mayor, dagita sarita a nakailabad iti surat ket arigna pannakainsulto kenkuana gapu ta ti kayat na laeng ket mapalagipan dagitoy iti madi nga ar-aramiden da.
Innayon na nga awan ti karbengan ti nailian a pulisya a mangipatupal iti pannakaserra dagiti kalsada gapu naipalaon daytoy iti local Government code.
