LAOAG CITY – Inlawlawag ni Vice Mayor Ferdinand Ignacio iti ili ti Paoay nga adda dagiti sumagmamano a pundo ti programa a saanda a mabalin a garawen.
Segun kenkuana, daytoy ket agingga a maideklara ti pundoda a mabalinen a kauten daytoy para iti pannakaipatungpal kadagiti programa.
Inbatadna a maladingitan daytoy gapu ta adda koma ti maiparuk-at a kuarta a 20 a milyon a pisos manipud iti Local Government Support Fund para iti Farm to Market Road iti Brgy. Pasil iti ili ti Paoay.
Kunana nga adda pay ti naiyuswat a panagtataripnong dagiti maseknan a residente maipapan iti daytoy a banag ken manamnama ti pannakaaprobarnan ngem saan daytoy a natuloy gapu ta masapol a makumpletoda pay laeng dagiti kasapulan a tungpalen.
Inlawlawagna a saan nga iti Sangguniang Bayan iti ili ti Paoay ti saan a mangayat ti pannakaaprobar ti nasao a gakat ngem sumursurotda laeng ti naiyatnag a pagalagadan ti Provincial Budget Office.
Kunana nga adda dagiti sumagmamano nga accounts ti lokal a gobierno a saan a natungpal ti Local Finance Committee rason a saan a pinatgan ti Department of Finance ken Department of Budget and Management.
Innayonna a kalikagumna a matratar daytoy a naimbag tapno maiplastar dagiti kasapulan a dokumento ken requirements a pakabenepisiaran dagiti umili.
