LAOAG CITY – Inpetteng ni Vice Mayor Maja Sales iti ili ti Pagudpud nga awan ti kinapudno na ti maibagbaga nga awan ti inpaay da a konsiderasyon ken ni Sang Bayan member Rajan Christoper Benemerito iti nasao nga ili.
Inlawlawag na a saanen a maannong ni Benemerito ti trabaho na kas konsehal iti ili ti Pagudpud gapu iti sakit ken kondisyon na.
Inpalgak pay ti bise mayor nga awan ti maris pulitika na ti nagbalin nga addang ti konseho kontra ken ni Benemerito no sadinno nga amin a konsiderasyon ket naipaay iti konsehal gapu ta agswelswelo iti baet a saan a mapan agat-atendar ti sesyon.
Innayon na a pinadas ni Benemerito ti napan nagatendar iti sesyon kalpasan a naopera ngem arigna saan a makasao ken basta lattan pimmanaw a saan a nagpakada kadakuada.
Kuna pay ni Sales a nawaya ni Benemerito a mapan agatendar ti sesyon tapno agdengngeg laeng iti mapagsasaritaan iti konseho laketdi kabaelan ti bagina.
Inkalintegan met ni Sales ti panagsaludsud da iti DILG no ania ti rumbeng nga aramiden da ken no mabalin a bakantean dan ti posisyon ni Benemerito gapu iti nabayagen a saanna a panagatendar ti sesyon.
Immun-una iti daytoy, Napaneknekan ti Bombo Radyo Laoag a saan a nakapan nakaatendar iti sesyon ni Sang bayan Member Rajan Christian Benemerito iti ili ti Pagudpud sipud Pebrero 25, 2021 agingga iti March 23, 2021.
Daytoy ket gapu ta dimmalan iti operasyon kalpasan ti pannakaatake na iti kallabes.
Basar iti naukkon a dokumento ti Bombo Radyo Laoag, adda ti insumitir ni Benemerito a sick leave iti Civil Service Commission (CSC) a pakairamanan ti medical certificate na a mangipaneknek a dimmalan daytoy iti operasyon.
Inlawlawag met ti CSC a no adda ti medical certificate ti maysa nga opisyal a maminlima a daras a saan a nakaatendar ti sesyon ket maibilang a sick leave ti panaglangan na a kas metlaeng kadagiti maipapaay a konsiderasyon kadagiti empleado ti gobierno.
Mainaig iti daytoy, basar pay kadagiti nakalap nga impormasyon ken dokumento ti Bombo Radyo ket namin-ado a daras a nagsurat ni Benemerito iti konseho no sadinno a kiniddaw na a makipartisipar paylaeng iti sesyon babaen iti google meet gapu ta agamak amangan no mairisgo ti salun-at na kalpasan ti idadalan na iti operasyon, ngem maipagarop a saan a pinatgan dagiti maseknan a kameng ti konseho.
Rumrumuar nga insungbat ti konseho a no kayat ni Benemerito ti agatendar iti sesyon ket personal a mapan nga isu ti inaramid ti nasao a konsehal.
Nupay kasta, rumrumuar nga iti panagatendar ni Benemerito iti sesyon ket nakarikna ti nakaro a nerbiyus gapu iti kaado dagiti saludsud kenkuana dagiti pada na a konsehal.
Kabayatanna, naduktalan pay ti Bombo Radyo Laoag a nagsurat ti konseho iti Department of Interior Local Government (DILG) no mabalin dan a bakantean ti posisyon ni Benemerito.
Isungbat met ti DILG a saan nga isuda ti mangibaga no mabalin da a bakantean ti posisyon ti konsehal gapu iti panagsakit na no di ket ti Korte.
Naamoan a kalpasan iti DILG ket insaruno nga inkamang ti konseho iti ili ti Pagudpud ti maipapan iti panaglangan ni Konsehal Benemerito iti Sang Panlalawigan.
