LAOAG CITY – Nasdaaw ni Vice Mayor Atty. Vicentito “Toto” Lazo ditoy ciudad ti Laoag a ti laengan nabati iti 46 million pesos a Bayanihan Heal As One Fund wenno ti IRA share ket nasurok laengen a 10 a milyon a pisos.
Daytoy ket kalpasan a dinamag ni Lazo iti Local Finance Committee parikular kenni Mrs. Melda Casas, officer in-charge ti Budget Office ditoy ciudad no anya ti nakaigatangan ti pondo.
Ummuna ditoy ti relief goods, PPEs, agas ken ti pannakatarimaan ti comfort room iti Central Terminal ken dagiti sanitation kits.
Mainaig iti daytoy, dinamag met ni SB Member RJ Fariñas no mano ti naigatang iti relief goods, ken naamoan nga umabot ti 28 a milyon a pisos ti nagastos.
Kuna ni Casas a naikonsiderar a sangaribo a pisos ti balor ti relief goods ti naited iti kada households a nasurok 28 a ribo a households.
Iti biang met ni Lazo, kalikagom na a nasken kuma a maiyuman kadakuada nga agpanpanday linteg no kasano ti pannakagastos ti nasao a pondo tapno saan da a makigkigtot iti mabati.
Insungbat met ni Casas a basar iti DBM ken ti nakailanad a guidelines iti pannaka-usar ti Bayanihan Heal As One Fund ket manipud kadakuada, maipasa iti City Development Council ken Bids of Awards.
Inlawlawag na pay a ti laeng akem ti Sang. Panlalawigan ket mangaprubar ken awan ti karbengan da a saan a pumabor kadagiti pangigastosan da iti 46 a milyon a pisos.
