LAOAG CITY – Naiget a banbantayan ti Commission on Elections (Comelec) ti vote buying ken vote selling kalpasan a nangrugin ti campaign period iti kaunaan a Bangsamoro Parliamentary Election.
Mainaig iti dayoy, inbatad ni Commission on Elections Chairman George Erwin Garcia a nangrugi metten ti panangmonitor ti Komite Kontra Bigay, Task Force KKK, Task Force Safe on Anti Discrimination ken Task Force Baklas.
Inbatad ni Garcia a saanda nga agpangadua a mangdiskualipikar ti kandidato ken mangipila ti kaso kriminal iti aglabsing kadagiti pagannurotan iti eleksion.
Inlawlawagna nga usarenda ti sibubukel a puersa ti linteg tapno mapagsungbat ti agsalungasing ken mangiwayat ti vote buying.
Mamati ni Garcia nga aramiden ti amin ti Bangsamoro tapno agbalin a naurnos, nakappia ken nadalus ti kaunaan a parliamentary elections.
Nakikoordinar metten ti Commission on Elections kadagiti dadduma pay nga ahensia ti gobierno para iti seguridad iti panawen ti kampania ken iti mismo nga aldaw ti panagbubutos inton Oktubre 13, 2025.
