LAOAG CITY – Nalawag a maikkaniwas iti linteg ti panangaramat ti vote buying.
Daytoy ti inbatad ni Atty. Julius Balbas, election officer ditoy siudad ti Laoag.
Inlawlawag ni Balbas a basar ti nakailanad iti Omnibus Election Code, ti vote buying ket agrimento iti nagbaetan ti kandidato ken ti botante.
Kuna na a daytoy ket ti panangawat ken panangited ti kwarta kasukat ti panangibutos ti maysa a kandidato.
Inbatadna a siasinoman a mapaneknekan nga agaramid iti nasao nga aktibidad ket mabalin a mapatawan ti pannusa nga agingga innem a tawen a pannakaibalod ken awan ti probation.
Mainaig iti daytoy, kuna na a dagiti kandidato a maduktalan nga adda ti pakainaiganna iti vote buying ket madiskwalipikar wenno maikkat iti pwesto.
Kabayatanna, inpakaammo ni Balbas nga iti maudi nga aldaw ti panagrehistro ket adda ti nainayun a 414 a botante ditoy siudad.
Kuna na a manamnama nga umabot iti 84,000 ti agbutos iti 2022 elections.
